Omailikano omuhanga otaa shunifa oimbuluma pedu-Ovafitaongalo

ONGWEDIVA- Ovafitaongalo okudja keengeleka da yooloka ova ti omailikano opamuhanga opashiwana naa twikile koitukulwa aishe yomoshilongo molwaashi omailikano otaa kwafele okushunifa oimbuluma pedu.

Edi ove di popya pefimbo va ninga eenghundafana naKundana oshivike sha dja ko.

Ovafitaongalo veengeleka da yooloka natango ova yandja omaliudo avo a yooloka eshi va pulwa kutya oshike tashi etifa omadipayafano moshilongo osho yo ngeenge omailikano omuhanga otaa kwafele tuu okushunifa oimbuluma pedu.

Omufitaongalo wongelaka ya Namutai Anglican Paulus Kanime okwa ti ohole yoimaliwa nonghalo yohole yomaliko oyo ta i hapupaleke omahepekafano omomaumbo tuu unene kovanyasha.

Okwa weda po ta ti ovanhu paife ova hala okudja ko okupitila moinima youpule.

“Oimengha oyo tai va shingile va ka ninge omadipao. Oshihopaenenwa shimwe osheshi kutya ovanyasha vahapu kave na etilokalunga,” ta ti.