Amushelelo a sindana oshipotha shetulo miipandeko shaali paveta

Aanandjungu Michael Amushelelo naDimbulukeni Nauyoma oya li menyanyu uunambo sho ya sindana mompangu oshipotha shoka kwa li ya tulilemo epangelo ano minista guuyuuki nepopilo lyoshigwana, ondjayi yetanga lyopolisi osho wo omutamanekindjayi mekwatathano noshiningwanima sho kwa li ya kwatwa po nokupatelwa mo, muMaalitsa gwo2023.

Mesindano ndyoka, Ompangu yoPombanda yaVenduka mEtitatu oya gandja elombwelo opo epangelo li fute Amushelelo ooN$300 000 omanga Nauyoma ota ka futwa ooN$80 000, metokolo lya ningwa komupanguli ta kwathele Natasha Bassingthwaighte.

Amushelelo naNauyoma okwa li ya fala kompangu ondjayi yetanga lyopolisi osho wo omutamanekindjayi taya pula ofuto sha landula sho ompangu muKotoba 2023, ye ekelehi omatamaneko kwa li ya taalela molwashoka inaya monika ondjo.