Etokolo lyomainda gokoWestern Bypass otali gandjwa ongula

Ompangu otayi gandja etokolo kombinga yeindilo lya gandjwa mompangu meendelelo komunandjungu Michael Amushelelo ta indile epangelo li kuthepo omainda gokushunitha pevi ondapo yiihauto, ngoka ga tulwa mopate yoWestern Bypass mOvenduka, ongula.

Ehangano lyokutonatela oopate moshilongo lyedhina Roads Authority, melongelokumwe nUuministili wIilonga nIiyenditho okwa li ya tsu kumwe okutula omainda gokushunitha pevi ondapo yiihauto mopate onene yooshambali ndjoka ya tseyika nawa nedhina B1 Western Bypass.

Opate ndjoka yoB1 Western Bypass oya andjuka nohayi longithwa wo kiihauto mbyoka tayi ya moshilandopangelo nenge tayi zi mo.