Ovakainhu nava pewe efano liwa koikundaneki – Kuugongelwa-Amadhila

Omunashipundi wOmutumba wOpashiwana Saara-Kuugongelwa-Amadhila okwa indila omahangano oikundaneki a xwepopeke omukalo oo haa longifa okukundaneka kombinga yovakainhu, unene ngaa ovo ve li momalelo. Eshi kwa li ta popi koshivilo shedimbuluko ledalo lehangano loNamibian Broadcasting Corporation (NBC) eshi la wanifa omido 35 Etitano, Kuugongelwa-Amadhila okwa ti omahangano oikundaneki luhapu ohaa kundaneke oinima ya kilikita ihe li mondjila, omaliumbato opaumwene nomasheko a kwatela mo ovakainhu omanga itaa tale nawa kekufombinga lao lopamufika moshiwana. Okwa londwela kutya okulopota kwoludi olo oku na oilanduli ya mana mo moshiwana.

“Oinima ei kai wa. Ohai teya po elineekelo loshiwana movaleli vovakainhu, nokuteya po omukumo wovakainhu ovo,” osho a ti ngaho. Omunashipundi okwa ti okuyandja omafano ai kovakainhu kwakeshe efiku ohaku va teya omukumo vaha kufe ombinga moipambele yoshiwana.