Omatale a pwiinina omeva konooli … ovanafaalama va taalela oshikukuta

Omatale oo a talika ko onga odjo ya kula yomeva nohai dulu oku umbata omeva efimbo lile monooli okwa pwiinina molwaashi omuloka woneudo hao naana wali upondola.

Ngoloneya woshitukulwa shaMusati Immanuel Shikongo okwa ti moshitukulwa shaye, shito omakemo oludi eli oha eya ngaho mu Aguste ile muSepetemba ashike neudo ovakalimo ova kalela nale ombelewa yaye tave keme enota.

“Okanala oka pwiinina nale keenhele dihapu vo ovanhu noimuna kave na kutya otava nhu vali peni,” ta ti.

Shikongo okwa yelifa kutya neudo ove li pyakidila nokutungulula okanala va kale veka kolonga koshi opo omeva aha pwiinine mo vali taa endelele.