Oshibofa shoonakunyeka omunangeshefa omaliko osha undulilwa komesho …vatano ina va monika natango

OKAHAO- Oshibofa shovatamanekwa vavali meponokelo nenyeko lomunangeshefa omukulunhu wofitola yoRani Group omaliko e li pongushu yomiliona N$1.8 osha undulilwa komesho.

Ovatamanekwa ova li va holoka momhangu yaKahao onghela noshibofa shavo osha undulilwa komesho nelalakano lokuninga omakonakono omoule.

Opolifi moshitukulwa shaMusati oya holola kutya ovatamanekwa ova holoka momhangu sha landula eshi va pondola okukwata po ookalyamupombo vavali molwaashi va ponokela omunangeshefa ndele tave mu nyeke omaliko e li pongushu yomiliona N$1.8.

Oshiningwanima osha ningwa oshivike sha dja ko pefimbo lokonguloshi mOkahao moshitukulwa shaMusati.