Ovanyasha va indilwa va kwatele po ondjokonona

Minista wehongo Sanet Steenkamp okwa indila ovanyasha vaha kale noutondwe, okatongo nomatopauko, ashike nava amene ondjokonona yoshilongo shaashi ove na oshinakuwanifa shokukwatela po ombili, ouyuki noukumwe. Eshi kwa li ta popi mefiku ledimbuluko lomadipayo a nghi na nghenda kOndangwa moshitopolwahoololo shaShana Etine, okwa ti ovanyasha nava ninge epupi li na oshinakuwanifa sha fimana shokutunga ombili yaalushe nokupotokonona eenamanana manga tava kwatele po yo ondjokonona yomadipayo a nghi na nghenda oo a ningilwa Ovaherero nOvanama pokati komudo 1904 no1908. “Epupi leni nali kale olo hali lundululile eendjokonona di luluma moinima i na oshilonga yopashiwana,” osho a ti ngaho.