Omukolo neshikisha wa shunifa eyandjo lohonde pedu

ONGWEDIVA – Omunambelewa konooli wehangano lokuyandja ohonde loNamibia Blood Transfusion Service (NAMBTS) Adolf Mwafangeyo okwa ti ehangano lavo paife ola taalela eshongo linene lomukolo neshikisha wa shunifa eyandjo lohonde pedu. Meenghundafana a ninga naKundana onghela okwa yelifa ta ti unene pefimbo e li lokufu kuna outalala ovanhu otava ende nakashona okukayandja ohonde. Okwa ti nena ove li koshipangelo shaNandjokwe okudja potundi 10h00 fiyo 15h30.

Okwa weda ta ti natango nena okudja potundi 10h00 fiyo 18h00 ove li pendiki lomangeshefelo Gwashamba mOndangwa. “Mongula otu li moshipangelo shaUtapi okudja potundi 10h00 fiyo 15h30,” ta ti. Okwa pula oshiwana opo shi holoke momwaalu muhapu okukayandja ohonde molwaashi osha fimana.