Omufekelwa medhipago lyaGeschke a kalekwa mondjeedhililo

Omulumentu ngoka ta fekelwa edhipago lyomukalimo gwomOmbaye, Barbara Geschke (80) okwa shunwa mondholongo konima sho a holoka mompangu yaMangestrata gwaMbaye oshiwike sha zi ko.

Omufekelwa Daniel Makie (44) okwa holoka mompangu mEtitano – konima yomasiku gaali sho a tulwa miipandeko. Noshipotha she oshuundulilwa komasiku 29 gaKotoba omanga omakonaakono taga tsikile.

Omudhimba gwa kuku Geschke okwa li gwi itsuwika megumbo lye momasiku 16 gaJuni konima sho aashinda ya kwatwa komalimbililo sho kaayewete omainyengo pegumbo lye noya tameke okuninga omakonakono.