Kwateni nawa oimaliwa yopeendjela – Kansela waNgenga

Abraham Mwanyekange Kansela woshikandjohololo Ongenga Josef Nenghwanya okwa londwela ovo hava mono opeendjela yepangelo ngaashi ovakulupe, ounona veli moluhepo osho yo oilema opo va longife nawa oimaliwa yavo. Okwa ti ombelewa yaye otai ka ninga oikonga yomatalelepo ovanhu koohandimwe okudja momafiku ahetatu fiyo 12 Juni neudo. Nenghwanya okwa ti omatalelepo otaa ningwa melongelo kumwe no polifi osho yo ouministeli woukashikekookanhu nonghalo nawa.

Ta ti eshi osha etwa konima eshi a nofwelwa ko kutya opena ovanhu tava longifa oshikuvika shavo epuko. “Ngeenge owa ende peekamba ovanhu vetu ovo vena omaulema naavo veli monghalo yopaulumomhumbwe, oto hange ashike tava indile eedola ile ta vati landele nge mo, ye omunhu oha kwata ngaho opeendjela yaye ashike ou hemu kwateke ite mu file oshisho,” ta ti. Okwa ti efimbo limwe ovo tava kwatele ovanhu ove li komakule ndele itava wapaleke oovene voimaliwa nande.