Ovanailongo nava landife ashike pauhapu- Ovanamibia va lulilwa

Abraham Mwanyekange Ovanangeshefa Ovanamibia ova ti otava xupu shokadila konima eshi vati eengeshefa davo dadengwa mo keengeshefa daavo vadja kondje yoshilongo. Ovanangeshefa ova holola yo kutya onghalo yavo oya dengelwa pedu unene molwa oNamibia Revenue Agency hano NamRA eshi tai kufa ko oimaliwa yavo pehe na onghenda. Omunangeshefa Bernhard Paulus, mwene woMy Kanos, okwa ti eengeshefa dovadjaidjai mopaife nado ota di landifa keshe shimwe ngaashi eengeshefa dOvanamibia tadi landifa.

“Okudja ngaho komboloto, ouleke, noukuki otava landifa,” Paulus ta holola ngaho. Paulus okwa ti ngeno eshi ena eshiivo musho osheshi kutya eengeshefa dokondje yoshilongo nadi landife ashike pouhapu ndele hakooshimwe ngaashi edi domoshilongo.

“Enda ashike nande omeengeshefa dOvachina, oto hange tava landifa eemboha, eetoshe, neenete dokulikosha. Aishe oyo ngeno oya pumbwa ashike oku landifwa kOvanamibia, ngeno shetu oku ka teka ashike kuvo mouhapu,’’ ta fatulula. Paulus oku wete ovanangeshefa vokondje yoshilongo va pumbwa okulandifa mouhapu.

Omunangeshefa nomuwiliki wongudu yoNamibi an Economic Freedom Fighters (NEFF) Epafras Mukwiilongo naye okwa holola eudonai molwa oshinima eshi. Meenghundafana naKundana, Mukwiilongo okwa lombwela Kundana kutya oshilongo manga inashi manguluka, ovanangeshefa Ovanamibia okwa li tave shi endifa nawa. “Vahapu ova dana yo onghandangala yokukwafela ovakwaita pefimbo lekondjelo manguluko.